माडागास्करमा प्लेगले ४० को मृत्यु

मंसिर, ६
अफ्रिकी मुलुक माडागास्करमा प्लेगको माहामारीबाट ४० जनाको मृत्यु भएको छ । विश्व स्वास्थ्य संगठन डब्लु एच ओ ले ८० भन्दा बढी प्लेग संक्रमित भेटिएको जनाएको छ । राजधानी अन्तानानारिभोमा बढी जनघनत्व  र कमजोर स्वास्थ्य सुविधाका कारण प्लेगको संक्रमण तीब्र गतिमा फैलन सक्ने डब्लु एच ओको चेतावनी छ । संक्रमण नियन्त्रणका लागि टास्क फोर्सले काम गरिरहेको अधिकारीहरुले जनाएका छन् । माडागास्करका कारागारहरुमा बन्दीहरु मुसाले सताइने हुंदा प्लेगको संक्रमण बढ्न मद्धत पुगेको बताइएको छ ।

१८ औँ सार्क तयारी बैठक सुरु

काठमाडौं, मंसिर ६
यही मंसिर १० र ११ गते काठमाडौमा हुने १८ औं सार्क शिखर सम्मेलनका तयारी बैठकहरु आजदेखि काठमाडौंमा सुरु भएको छ । सार्क सम्मेलनअन्तर्गत आज भएको कार्यक्रम समितिको बैठकले सार्कका ११ क्षेत्रीय केन्द्रमध्ये तीन वटा खारेज गर्न र चार वटालाई एकापसमा गाभ्न सिफारिस गर्ने निर्णय गरेको छ । खारेज गर्न सिफारिस गरिएका केन्द्रमा सार्क सूचना केन्द्र, मानव संसाधन केन्द्र र सार्क अभिलेख केन्द्र  छन् । त्यस्तै गाभ्न सिफारिस गरिएका केन्द्रमा वन व्यवस्थापन केन्द्र, विपद् व्यवस्थापन केन्द्र, तटीय क्षेत्र व्यवस्थापन केन्द्र र जलवायु अनुसन्धान केन्द्र  छन् ।
बैठकले प्रस्ताव गरेको सो सिफारिसलाई सन् २०१५ डिसेम्बरदेखि  प्रक्रियामा लगी अन्तिम रुप दिइने सार्क महासचिव अर्जुनबहादुर थापाले जानकारी दिनु भयो । शिखर सम्मेलनको प्रारम्भका रुपमा लिइने उक्त बैठकले सार्क संरचनाको हेरफेर र जिम्मेवारीलाई निर्धारण गर्नसमेत प्रस्ताव गर्ने जनाइएको छ ।
होटल सोल्टीमा भएको समितिको बैठकमा आठ वटै सदस्य राष्ट्रका सहसचिवको नेतृत्वको टोलीको सहभागिता छ । बैठकको प्ररम्भमा सार्कका महासचिव थापाले स्वागत गरेका थिए । कार्यक्रम समितिको अध्यक्षता माल्दिभ्सले नेपाललाई हस्तान्तरण गरेको छ । समितिको बैठकमा नेपालका तर्फबाट परराष्ट्र मन्त्रालयका सहसचिव यज्ञबहादुर हमालको नेतृत्वमा टोली सहभागी  छ ।

नेकपा–माओवादीको बैठक स्थगित

काठमाडौं, मंसिर ६
पार्टीमा वढ्दो आन्तरिक विवाद समाधानका लागि भन्दै नेकपा माओवादीले आजका लागि बोलाएको केन्द्रीय समितिको बिस्तारित वैठक अन्तिम समयमा स्थगित भएको छ । ललितपुरको कुपण्डोल स्थित नेवाः राज्य समितिको कार्यालयमा बोलाइएको बैठक सचिव नेत्रविक्रम चन्द पक्ष सहभागी नभएपछि स्थगित गरिएको हो । भोलि हुने बैठकमा पनि चन्द पक्ष सहभागी हुने नहुनेबारे अन्यौल कायमै छ । भोलिको वैठकमा महासचिव राम वहादुर थापाले पार्टीको आन्तरिक विवाद समाधानका लागि प्रस्ताव पेश गर्ने जनाइएको छ । नेकपा माओवादीमा पार्टीको कार्यदिशाको विषयमा गम्भीर मतभेद छ । पछिल्लो समय सचिव चन्द पक्षले गोप्य भेला गरेपछि संस्थापन पक्ष सशंकित बनेको छ । संस्थापन पक्षले पार्टी हित विपरित हुने गरी कुनै पनि गतिविधि नगर्न चन्द पक्षलाई आग्रह गर्दै आएको छ ।

प्रधानमन्त्री र प्रचण्डबीच भेटवार्ता

काठमाडौं, मंसिर ६
कांग्रेस सभापति तथा प्रधानमन्त्री सुशील कोइराला र एकीकृत माओवादीका अध्यक्ष पुष्पकमल दाहाल प्रचण्डबीच आज भेटवार्ता भएको छ । प्रधानमन्त्री निवास बालुवाटारमा भएको भेटमा उहाँहरुबीच संविधानका अन्तर्वस्तुमा दलहरुबीच देखिएको विवाद समाधानको उपाय खोज्ने बारेमा छलफल भएको छ । छलफलमा सहमतिको आधारमा संविधान बनाउने विषयमा विकल्प खोज्न प्रधानमन्त्री तयार देखिएको प्रचण्डलाई उधृत गर्दै प्रचण्डका स्वकीय सचिव चूडामणि खड्काले जानकारी दिनुभयो । प्रधानमन्त्री कोइरालाले प्रचण्डलाई विवाद समाधानका लागि छिट्टै मुख्य तीन दलको बैठक बोलाउने आश्वासन दिनुभएको छ । नेपालगञ्ज पुग्नु भएका केपी ओली काठमाडौं फकिईसकेकाले तत्कालै त्रिपक्षीय बैठक बोलाउन प्रधानमन्त्री र प्रचण्डवीच सहमति भएको बताइएको छ ।
यस्तै, उहाँहरुबीच १८ औं सार्क सिखर सम्मेलनमा सरकार र प्रतिपक्षी एक भएर अघि बढ्ने सहमती समेत भएको छ ।